shab ki wo majlis-faroz-e-KHalwat-e-namus tha

shab ki vo majlis-faroz-e-ḳhalvat-e-nāmūs thā

rishta-e-har-sham.a ḳhār-e-kisvat-e-fānūs thā

mash.had-e-āshiq se kosoñ tak jo ugtī hai hinā

kis qadar yā-rab halāk-e-hasrat-e-pā-bos thā

hāsil-e-ulfat na dekhā juz-shikast-e-ārzū

dil-ba-dil paivasta goyā yak lab-e-afsos thā

kyā kahūñ bīmārī-e-ġham kī farāġhat kā bayāñ

jo ki khāyā ḳhūn-e-dil be-minnat-e-kaimūs thā

but-parastī hai bahār-e-naqsh-bandī-hā-e-dahr

har sarīr-e-ḳhāma meñ yak nālā-e-nāqūs thā

tab' kī vāshud ne rang-e-yak-gulistāñ gul kiyā

ye dil-e-vābasta goyā baiza-e-tā.ūs thā

kal 'asad' ko ham ne dekhā gosha-e-ġham-ḳhāna meñ

dast-barsar sar-ba-zānū-e-dil-e-māyūs thā

shab ki wo majlis-faroz-e-KHalwat-e-namus tha

rishta-e-har-shama KHar-e-kiswat-e-fanus tha

mashhad-e-ashiq se koson tak jo ugti hai hina

kis qadar ya-rab halak-e-hasrat-e-pa-bos tha

hasil-e-ulfat na dekha juz-shikast-e-arzu

dil-ba-dil paiwasta goya yak lab-e-afsos tha

kya kahun bimari-e-gham ki faraghat ka bayan

jo ki khaya KHun-e-dil be-minnat-e-kaimus tha

but-parasti hai bahaar-e-naqsh-bandi-ha-e-dahr

har sarir-e-KHama mein yak nala-e-naqus tha

tab' ki washud ne rang-e-yak-gulistan gul kiya

ye dil-e-wabasta goya baiza-e-taus tha

kal 'asad' ko hum ne dekha gosha-e-gham-KHana mein

dast-barsar sar-ba-zanu-e-dil-e-mayus tha