shab ki shab mahfil mein koi KHush-kalam aaya to kya

shab kī shab mahfil meñ koī ḳhush-kalām aayā to kyā

tyaag dī jo bazm us meñ merā naam aayā to kyā

zīnat-e-qirtās jitne harf the dushman hue

ek terā ism zer-e-insirām aayā to kyā

narġha-e-ādā meñ ghirte hī badan ġhirbān thā

ab safa-e-yārāñ se koī be-niyām aayā to kyā

kushtagān-e-shab ko pursā dene vaale ye bhī sun

ab tire lahje meñ rañg-e-ehtarām aayā to kyā

muntazir āñkheñ firāq-e-yār meñ pathrā ga.iiñ

sub.h kā bhūlā palaT kar ghar jo shaam aayā to kyā

dasht-e-ḳhvāhish meñ ba-kār-e-said jab muddat ke ba.ad

ik ġhazāl-e-pā-burīda zer-e-dām aayā to kyā

shab ki shab mahfil mein koi KHush-kalam aaya to kya

tyag di jo bazm us mein mera nam aaya to kya

zinat-e-qirtas jitne harf the dushman hue

ek tera ism zer-e-insiram aaya to kya

nargha-e-ada mein ghirte hi badan ghirban tha

ab safa-e-yaran se koi be-niyam aaya to kya

kushtagan-e-shab ko pursa dene wale ye bhi sun

ab tere lahje mein rang-e-ehtaram aaya to kya

muntazir aankhen firaq-e-yar mein pathra gain

subh ka bhula palaT kar ghar jo sham aaya to kya

dasht-e-KHwahish mein ba-kar-e-said jab muddat ke baad

ek ghazal-e-pa-burida zer-e-dam aaya to kya