shab ki zulfen sanwarta hua main

shab kī zulfeñ sañvārtā huā maiñ

ye tire saath jāgtā huā maiñ

rishta-e-jāñ se kaT gayā yaksar

kuchh ta.alluq nibāhtā huā maiñ

vo sar-e-bazm jhūmtā huā tū

ye sar-e-rah karāhtā huā maiñ

vo sar-e-shāḳh tū mahaktā huā

aur sar-e-ḳhāk sūkhtā huā maiñ

gir gayā thak ke apne qadmoñ meñ

tujh se tujh ko hī māñgtā huā maiñ

aks-dar-aks phailtā huā tū

ḳhvāb-dar-ḳhvāb bhāgtā huā maiñ

tere sarsabz mausamoñ se judā

dasht kī ḳhaak phāñktā huā maiñ

apne taaza vajūd meñ gum huuñ

tujhe nasloñ se khojtā huā maiñ

mujhe qarnoñ meñ sochtā huā tū

tujhe sadiyoñ meñ DhūñDhtā huā maiñ

ye mirā dard bhūltā huā tū

ye tirī ḳhair māñgtā huā maiñ

adl kī maslahat kā ā.īna

ye sar-e-dār jhūltā huā maiñ

shab ki zulfen sanwarta hua main

ye tere sath jagta hua main

rishta-e-jaan se kaT gaya yaksar

kuchh talluq nibahta hua main

wo sar-e-bazm jhumta hua tu

ye sar-e-rah karahta hua main

wo sar-e-shaKH tu mahakta hua

aur sar-e-KHak sukhta hua main

gir gaya thak ke apne qadmon mein

tujh se tujh ko hi mangta hua main

aks-dar-aks phailta hua tu

KHwab-dar-KHwab bhagta hua main

tere sarsabz mausamon se juda

dasht ki KHak phankta hua main

apne taza wajud mein gum hun

tujhe naslon se khojta hua main

mujhe qarnon mein sochta hua tu

tujhe sadiyon mein DhunDhta hua main

ye mera dard bhulta hua tu

ye teri KHair mangta hua main

adl ki maslahat ka aaina

ye sar-e-dar jhulta hua main