shab shauq le gaya tha hamein uske ghar talak

shab shauq le gayā thā hameñ us ke ghar talak

par ġhash sā aa gayā vohīñ pahuñche jo dar talak

gar ham ko lag ga.ī haiñ kabhī hichkiyāñ to ham

aaTh aaTh aañsū ro.e haiñ do do pahar talak

Dartā huuñ maiñ ye gum na kare aap ko kahīñ

phir ja.ad ko huī hai rasā.ī kamar talak

parvāna kyā uḌe hai charāġhāñ meñ to nahīñ

pahuñchā jo koī sho.ala tire bāl-o-par talak

sahrā-e-kushtagāñ meñ tire kal gayā thā maiñ

dekhūñ to lāla-zār hai hadd-e-nazar talak

phailāv bahr-e-ashk kā apne maiñ kyā kahūñ

pahuñchī hai mauj gar ye mirī bahr-o-bar talak

ve din kidhar ga.e ki maiñ likh likh ke ḳhat-e-shauq

jaatā thā aap girya-kunāñ nāma-bar talak

shab us kī bazm meñ jo ga.e ham to 'mus.hafī'

aise jame ki vaañ se na uTThe sahar talak

shab shauq le gaya tha hamein us ke ghar talak

par ghash sa aa gaya wohin pahunche jo dar talak

gar hum ko lag gai hain kabhi hichkiyan to hum

aaTh aaTh aansu roe hain do do pahar talak

Darta hun main ye gum na kare aap ko kahin

phir jad ko hui hai rasai kamar talak

parwana kya uDe hai charaghan mein to nahin

pahuncha jo koi shoala tere baal-o-par talak

sahra-e-kushtagan mein tere kal gaya tha main

dekhun to lala-zar hai hadd-e-nazar talak

phailaw bahr-e-ashk ka apne main kya kahun

pahunchi hai mauj gar ye meri bahr-o-bar talak

we din kidhar gae ki main likh likh ke KHat-e-shauq

jata tha aap girya-kunan nama-bar talak

shab us ki bazm mein jo gae hum to 'mushafi'

aise jame ki wan se na uTThe sahar talak