shabnam ne kab is baat se inkar kiya hai

shabnam ne kab is baat se inkār kiyā hai

kirnoñ ne sadā us se bahut pyaar kiyā hai

shāḳhoñ pe ab ilzām koī bād-e-sabā kyuuñ

tū ne hī to har shāḳh ko talvār kiyā hai

kis kis pe kiye lutf-o-karam shahr-e-tarab ne

ham par bhī koī sāya-e-dīvār kiyā hai

kuchh saḳhtī-e-imroz to kuchh ye bhī ki yaaro

qarz-e-ġham-e-fardā ne girāñ-bār kiyā hai

jañg apne muqaddar se ḳharīdī hai ki ham ne

ik shaḳhs hai dil de kī jise yaar kiyā hai

ik lamhe ke ehsās ne tanhā-safarī meñ

barsoñ ke liye vaqt se hushiyār kiyā hai

hogā koī bhed is meñ ki naam apnā hamīñ ne

bad-nām sar-e-kūcha-o-bāzār kiyā hai

jis dasht se laa.e the vahīñ le chalo yaaro

kyuuñ aaise ḳharābe meñ hameñ ḳhaar kiyā hai

ḳhush hote haiñ sheroñ se samajhte haiñ kahāñ log

shā.er ne kisī dard kā iz.hār kiyā hai

shabnam ne kab is baat se inkar kiya hai

kirnon ne sada us se bahut pyar kiya hai

shaKHon pe ab ilzam koi baad-e-saba kyun

tu ne hi to har shaKH ko talwar kiya hai

kis kis pe kiye lutf-o-karam shahr-e-tarab ne

hum par bhi koi saya-e-diwar kiya hai

kuchh saKHti-e-imroz to kuchh ye bhi ki yaro

qarz-e-gham-e-farda ne giran-bar kiya hai

jang apne muqaddar se KHaridi hai ki hum ne

ek shaKHs hai dil de ki jise yar kiya hai

ek lamhe ke ehsas ne tanha-safari mein

barson ke liye waqt se hushiyar kiya hai

hoga koi bhed is mein ki nam apna hamin ne

bad-nam sar-e-kucha-o-bazar kiya hai

jis dasht se lae the wahin le chalo yaro

kyun aaise KHarabe mein hamein KHar kiya hai

KHush hote hain sheron se samajhte hain kahan log

shaer ne kisi dard ka izhaar kiya hai