shafaq ka rang ka KHushbu ka KHwab tha main bhi

shafaq kā rañg kā ḳhushbū kā ḳhvāb thā maiñ bhī

parā.e haath meñ koī gulāb thā maiñ bhī

na jaane kitne zamāne mire vajūd meñ the

ḳhud apnī zaat meñ ik inqalāb thā maiñ bhī

kahāniyāñ to bahut thiiñ magar likhī na ga.iiñ

kisī ke haath meñ saada kitāb thā maiñ bhī

na jaane kyuuñ nazar-andāz kar diyā mujh ko

jahāñ pe tum the vahīñ dastiyāb thā maiñ bhī

añdhere bone kā un ko junūn thā jaise

chamak meñ apnī jagah āftāb thā maiñ bhī

tumhī nahīñ the samundar ke pāniyoñ kī tarah

kabhī sukūn kabhī iztirāb thā maiñ bhī

na pūchho kitnā mazā guftugū meñ aayā hai

zahīn vo bhī thā hāzir-javāb thā maiñ bhī

shafaq ka rang ka KHushbu ka KHwab tha main bhi

parae hath mein koi gulab tha main bhi

na jaane kitne zamane mere wajud mein the

KHud apni zat mein ek inqalab tha main bhi

kahaniyan to bahut thin magar likhi na gain

kisi ke hath mein sada kitab tha main bhi

na jaane kyun nazar-andaz kar diya mujh ko

jahan pe tum the wahin dastiyab tha main bhi

andhere bone ka un ko junun tha jaise

chamak mein apni jagah aaftab tha main bhi

tumhi nahin the samundar ke paniyon ki tarah

kabhi sukun kabhi iztirab tha main bhi

na puchho kitna maza guftugu mein aaya hai

zahin wo bhi tha hazir-jawab tha main bhi