shahr aabaad ho chuka bhi hai

shahr ābād ho chukā bhī hai

aur phir se ujaḌ rahā bhī hai

roz-o-shab kā safar bhī hai jaarī

aur musāfir thakā huā bhī hai

raat hai chāñd hai sitāre haiñ

aur ḳhvāboñ kā silsila bhī hai

ik to hūrān-e-ḳhuld kī ḳhvāhish

aur phir baḳht-e-nā-rasā bhī hai

ḳhud-farebī kī āḳhirī had tak

ham ne badlā to ā.īna bhī hai

ham ne baazī to yuuñ nahīñ haarī

koī apnā idhar gayā bhī hai

ek to duur hai bahut manzil

us pe pur-pech rāsta bhī hai

zindagī jitnī ḳhūbsūrat hai

us se baḌh kar ye bad-numā bhī hai

shahr meñ shor hai qayāmat kā

aur 'farhat' ġhazal-sarā bhī hai

shahr aabaad ho chuka bhi hai

aur phir se ujaD raha bhi hai

roz-o-shab ka safar bhi hai jari

aur musafir thaka hua bhi hai

raat hai chand hai sitare hain

aur KHwabon ka silsila bhi hai

ek to huran-e-KHuld ki KHwahish

aur phir baKHt-e-na-rasa bhi hai

KHud-farebi ki aaKHiri had tak

hum ne badla to aaina bhi hai

hum ne bazi to yun nahin haari

koi apna idhar gaya bhi hai

ek to dur hai bahut manzil

us pe pur-pech rasta bhi hai

zindagi jitni KHubsurat hai

us se baDh kar ye bad-numa bhi hai

shahr mein shor hai qayamat ka

aur 'farhat' ghazal-sara bhi hai