shahr ki fasilon par zaKHm jagmagaenge

shahr kī fasīloñ par zaḳhm jagmagā.eñge

ye charāġh-e-manzil haiñ rāsta batā.eñge

peḌ ham mohabbat ke dasht meñ lagā.eñge

be-makāñ parindoñ ko dhuup se bachā.eñge

zahr jab bhī ugloge dostī ke parde meñ

pattharoñ ke lahje meñ ham bhī gungunā.eñge

jañgaloñ kī jharnoñ kī kāġhazī ye tasvīreñ

ghar ke band kamroñ meñ kab talak sajā.eñge

ḳhuun ban ke rag rag meñ duudh maañ kā bahtā hai

qarz ye bhī vājib hai kaise ham chukā.eñge

thak ke lauT jā.eñgī āñdhiyāñ siyāsat kī

jin kī lau rahe qaa.em vo diye jalā.eñge

ye jhukī jhukī palkeñ mat uThā.iye sāhab

jhiil jaisī āñkhoñ meñ log Duub jā.eñge

shahr ki fasilon par zaKHm jagmagaenge

ye charagh-e-manzil hain rasta bataenge

peD hum mohabbat ke dasht mein lagaenge

be-makan parindon ko dhup se bachaenge

zahr jab bhi ugloge dosti ke parde mein

pattharon ke lahje mein hum bhi gungunaenge

jangalon ki jharnon ki kaghazi ye taswiren

ghar ke band kamron mein kab talak sajaenge

KHun ban ke rag rag mein dudh man ka bahta hai

qarz ye bhi wajib hai kaise hum chukaenge

thak ke lauT jaengi aandhiyan siyasat ki

jin ki lau rahe qaem wo diye jalaenge

ye jhuki jhuki palken mat uThaiye sahab

jhil jaisi aankhon mein log Dub jaenge