shahr-e-alam ka shahryar aa gaya

shahr-e-ālām kā shahryār aa gayā

sar-barahna mirā tājdār aa gayā

sub.h-e-ḳhandāñ liye rū-e-tābāñ liye

shām-e-ġhurbat tirā ġham-gusār aa gayā

sabr arzāñ huā jabr larzāñ huā

sāhab-e-shān-e-sad-iḳhtiyār aa gayā

nāla-kāro uTho sogvāro uTho

be-qarāro koī be-qarār aa gayā

kā.enāt apnī hai ab hayāt apnī hai

ġhamkasho ġham-zado ġham-gusār aa gayā

taaza ab ġham na kar ḳham ko ab ḳham na kar

sāqiyā hāsil-e-intizār aa gayā

jaam chhalkā diyā sho.ala bhaḌkā diyā

yaad āḳhir zuleḳhā kā pyaar aa gayā

raat khulne lagī chāñdnī dhul ga.ī

māh-vash mah-shikan mah-shi.ār aa gayā

zaḳhm-e-pinhāñ mahak tā.ir-e-jāñ lahak

gul-badan gul-jabīñ gul-e-ezār aa gayā

baat kyuuñ rok lī aañkh kyuuñ nam huī

mujh ko dekho mujhe e.atibār aa gayā

aap socheñ 'nazar' kis liye mast hai

aap ke saath abr-e-bahār aa gayā

shahr-e-alam ka shahryar aa gaya

sar-barahna mera tajdar aa gaya

subh-e-KHandan liye ru-e-taban liye

sham-e-ghurbat tera gham-gusar aa gaya

sabr arzan hua jabr larzan hua

sahab-e-shan-e-sad-iKHtiyar aa gaya

nala-karo uTho sogwaro uTho

be-qararo koi be-qarar aa gaya

kaenat apni hai ab hayat apni hai

ghamkasho gham-zado gham-gusar aa gaya

taza ab gham na kar KHam ko ab KHam na kar

saqiya hasil-e-intizar aa gaya

jam chhalka diya shoala bhaDka diya

yaad aaKHir zuleKHa ka pyar aa gaya

raat khulne lagi chandni dhul gai

mah-wash mah-shikan mah-shiar aa gaya

zaKHm-e-pinhan mahak tair-e-jaan lahak

gul-badan gul-jabin gul-e-ezar aa gaya

baat kyun rok li aankh kyun nam hui

mujh ko dekho mujhe eatibar aa gaya

aap sochen 'nazar' kis liye mast hai

aap ke sath abr-e-bahaar aa gaya