shahr-e-be-mehr mein milta kahan dildar koi

shahr-e-be-mehr meñ miltā kahāñ dildār koī

kaash mil jaatā hameñ majma-e-aġhyār koī

chiir de qalb-e-zamīñ toḌ de zanjīr-e-zamāñ

chheḌ ab aisā fasāna-e-dil-e-nādār koī

nāla-e-dil se jigar hotā hai chhalnī yārab

sabr kartī huuñ to chal jaatī hai talvār koī

bujh ga.ī rāh-e-vafā Duub ga.ī sub.h-e-umīd

le ke ab aa.egā kyā va.ada-e-dīdār koī

ek ek kar ke huī bazm-e-mohabbat ḳhālī

nazar aatā nahīñ ab yaar vafādār koī

jaane kin jabr kī zanjīroñ meñ jakḌī hai hayāt

haiñ kahīñ chāra-e-vahshat ke bhī āsār koī

ye zabānñ-bandī-e-ehsās ye jabr hālāt

jurm hai khole agar dīda-e-bedār koī

shahr-e-be-mehr mein milta kahan dildar koi

kash mil jata hamein majma-e-aghyar koi

chir de qalb-e-zamin toD de zanjir-e-zaman

chheD ab aisa fasana-e-dil-e-nadar koi

nala-e-dil se jigar hota hai chhalni yarab

sabr karti hun to chal jati hai talwar koi

bujh gai rah-e-wafa Dub gai subh-e-umid

le ke ab aaega kya wada-e-didar koi

ek ek kar ke hui bazm-e-mohabbat KHali

nazar aata nahin ab yar wafadar koi

jaane kin jabr ki zanjiron mein jakDi hai hayat

hain kahin chaara-e-wahshat ke bhi aasar koi

ye zabann-bandi-e-ehsas ye jabr haalat

jurm hai khole agar dida-e-bedar koi