shahr-e-tarik ko sapnon ka nagar hone tak

shahr-e-tārīk ko sapnoñ kā nagar hone tak

muntazir baiThī huuñ is shab kī sahar hone tak

hijr meñ hālat-e-dil kaise sambhal pā.egī

rāh-e-dushvār se yādoñ kā guzar hone tak

raat kī god meñ armān liye baiThī huuñ

kaash aa jaa.e vo ye raat basar hone tak

us kā mujh se hai taqāzā ki gulistāñ meñ rahūñ

apnī ra.anā.ī kā phūloñ pe asar hone tak

pyaar ko ahl-e-zamāna se bachā kar rakhiye

pyaar kī apnī sabhī manzileñ sar hone tak

vo to aa jā.egā mujh ko ye yaqīñ hai lekin

miT na jā.ūñ kahīñ maiñ us ko ḳhabar hone tak

tum ne 'zaryāb' yūñhī naġhma sunāyā thā use

us ko gaanā hai magar pyaar amar hone tak

shahr-e-tarik ko sapnon ka nagar hone tak

muntazir baiThi hun is shab ki sahar hone tak

hijr mein haalat-e-dil kaise sambhal paegi

rah-e-dushwar se yaadon ka guzar hone tak

raat ki god mein arman liye baiThi hun

kash aa jae wo ye raat basar hone tak

us ka mujh se hai taqaza ki gulistan mein rahun

apni ranai ka phulon pe asar hone tak

pyar ko ahl-e-zamana se bacha kar rakhiye

pyar ki apni sabhi manzilen sar hone tak

wo to aa jaega mujh ko ye yaqin hai lekin

miT na jaun kahin main us ko KHabar hone tak

tum ne 'zaryab' yunhi naghma sunaya tha use

us ko gana hai magar pyar amar hone tak