shahr-e-ummid se kab koi sada aati hai

shahr-e-ummīd se kab koī sadā aatī hai

samt-e-sahrā se faqat garm havā aatī hai

is nadī ne to ka.ī 'ishq Dubā.e hoñge

is kī lahroñ se tabhī bū-e-hinā aatī hai

jab tujhe bhūlne baiTheñ to nazar chupke se

bādaloñ meñ tirī tasvīr banā aatī hai

dil to kahtā hai bulā luuñ maiñ qazā ko apnī

darmiyāñ roz magar merī anā aatī hai

zahr suqrāt ko ham phir se pilā deñ lekin

zahr pī kar use jiine kī adā aatī hai

qais par sang to pheñko ye magar yaad rahe

jis jagah 'ishq mare vaañ pe vabā aatī hai

ik darīcha hai jo khultā hai tumhārī jānib

hujra-e-qalb meñ yak-tarfa havā aatī hai

shahr-e-ummid se kab koi sada aati hai

samt-e-sahra se faqat garm hawa aati hai

is nadi ne to kai 'ishq Dubae honge

is ki lahron se tabhi bu-e-hina aati hai

jab tujhe bhulne baiThen to nazar chupke se

baadalon mein teri taswir bana aati hai

dil to kahta hai bula lun main qaza ko apni

darmiyan roz magar meri ana aati hai

zahr suqraat ko hum phir se pila den lekin

zahr pi kar use jine ki ada aati hai

qais par sang to phenko ye magar yaad rahe

jis jagah 'ishq mare wan pe waba aati hai

ek daricha hai jo khulta hai tumhaari jaanib

hujra-e-qalb mein yak-tarfa hawa aati hai