shahr ka shahr hai be-zar kahan jaun main

shahr kā shahr hai be-zār kahāñ jā.ūñ maiñ

aur tanhā.ī hai dushvār kahāñ jā.ūñ maiñ

log marte haiñ sisakte haiñ maze lete haiñ

dekh kar surḳhi-e-aḳhbār kahāñ jā.ūñ maiñ

tū jo kahtā hai ki ye ḳhāk-e-vatan terī hai

maiñ kahāñ par huuñ mire yaar kahāñ jā.ūñ maiñ

ek inkār pe mauqūf haiñ saare qisse

maiñ kahāñ sāhab-e-kirdār kahāñ jā.ūñ maiñ

mujh ko rishtoñ kī tijārat kabhī manzūr na thī

sochtā huuñ sar-e-bāzār kahāñ jā.ūñ maiñ

pārsā ḳhvāb sabhī us ke tasarruf meñ rahe

raat bhī ho ga.ī badkār kahāñ jā.ūñ maiñ

koī manzil tirī niyyat se kabhī raushan ho

ai mire qāfila-sālār kahāñ jā.ūñ maiñ

ek jhanDe haiñ sabhī rañg judā haiñ un ke

kaun hai kis kā alam-dār kahāñ jā.ūñ maiñ

jitne munkir the tire saare farishte nikle

ek maiñ terā gunahgār kahāñ jā.ūñ maiñ

maiñ kināre pe khaḌā soch rahā huuñ 'ḳhurshīd'

naav ke saath hai mañjdhār kahāñ jā.ūñ maiñ

shahr ka shahr hai be-zar kahan jaun main

aur tanhai hai dushwar kahan jaun main

log marte hain sisakte hain maze lete hain

dekh kar surKHi-e-aKHbar kahan jaun main

tu jo kahta hai ki ye KHak-e-watan teri hai

main kahan par hun mere yar kahan jaun main

ek inkar pe mauquf hain sare qisse

main kahan sahab-e-kirdar kahan jaun main

mujh ko rishton ki tijarat kabhi manzur na thi

sochta hun sar-e-bazar kahan jaun main

parsa KHwab sabhi us ke tasarruf mein rahe

raat bhi ho gai badkar kahan jaun main

koi manzil teri niyyat se kabhi raushan ho

ai mere qafila-salar kahan jaun main

ek jhanDe hain sabhi rang juda hain un ke

kaun hai kis ka alam-dar kahan jaun main

jitne munkir the tere sare farishte nikle

ek main tera gunahgar kahan jaun main

main kinare pe khaDa soch raha hun 'KHurshid'

naw ke sath hai manjdhaar kahan jaun main