shahr ki viraniyon aur maqbaron ko dekhna

shahr kī vīrāniyoñ aur maqbaroñ ko dekhnā

apnī qismat meñ hai kyoñ ḳhālī gharoñ ko dekhnā

muTThiyoñ ko band rakhnā dūsroñ ke sāmne

haule haule ret bante pattharoñ ko dekhnā

pahle apne lafz kāġhaz kī tahoñ meñ DhūñDhnā

ajnabī nazroñ se phir dīda-varoñ ko dekhnā

ek pal meñ apne andar TuuT jaanā aur phir

dhund meñ lipTe hue sab manzaroñ ko dekhnā

maiñ zamīñ ko chhoḌ kar uḌne lagā huuñ aur tum

āsmānoñ se mire girte paroñ ko dekhnā

us kī tasvīreñ abhī se tum sajā lo zehn meñ

phir bahut mushkil rahegā ḳhud-saroñ ko dekhnā

phir vahī hai tishnagī aur nahr par lashkar magar

ab kaTe baazū nahīñ girte saroñ ko dekhnā

shahr ki viraniyon aur maqbaron ko dekhna

apni qismat mein hai kyon KHali gharon ko dekhna

muTThiyon ko band rakhna dusron ke samne

haule haule ret bante pattharon ko dekhna

pahle apne lafz kaghaz ki tahon mein DhunDhna

ajnabi nazron se phir dida-waron ko dekhna

ek pal mein apne andar TuT jaana aur phir

dhund mein lipTe hue sab manzaron ko dekhna

main zamin ko chhoD kar uDne laga hun aur tum

aasmanon se mere girte paron ko dekhna

us ki taswiren abhi se tum saja lo zehn mein

phir bahut mushkil rahega KHud-saron ko dekhna

phir wahi hai tishnagi aur nahr par lashkar magar

ab kaTe bazu nahin girte saron ko dekhna