shahr ko aatish-e-ranjish ke dhuan tak dekhun

shahr ko ātish-e-ranjish ke dhuāñ tak dekhūñ

maqtal ziist ko āḳhir maiñ kahāñ tak dekhūñ

phir ye mānūñgā ḳhamoshī pe zavāl aayā hai

dil dhaḌakne kī sadā jab maiñ zabāñ tak dekhūñ

ye tamannā hai ḳhudā ālam-e-hastī meñ tire

maiñ ayaañ dekhnā chāhūñ to nihāñ tak dekhūñ

jab ki ab rābta rakhne kā bahut hai imkāñ

phir bhī vīrāniyāñ phailīñ haiñ jahāñ tak dekhūñ

kyā tasavvur mirī āñkhoñ ne navāzā hai mujhe

ḳhud ko dekhūñ to maiñ ehsās-e-ziyāñ tak dekhūñ

māntā huuñ ki hai zulmāt-e-azal us kā nasīb

raat kī zid hai use apnī fuġhāñ tak dekhūñ

ye bhī aslāf kī tahzīb hai 'az.har' maiñ yahāñ

apnā kirdār tamām amn-e-amāñ tak dekhūñ

shahr ko aatish-e-ranjish ke dhuan tak dekhun

maqtal zist ko aaKHir main kahan tak dekhun

phir ye manunga KHamoshi pe zawal aaya hai

dil dhaDakne ki sada jab main zaban tak dekhun

ye tamanna hai KHuda aalam-e-hasti mein tere

main ayan dekhna chahun to nihan tak dekhun

jab ki ab rabta rakhne ka bahut hai imkan

phir bhi viraniyan phailin hain jahan tak dekhun

kya tasawwur meri aankhon ne nawaza hai mujhe

KHud ko dekhun to main ehsas-e-ziyan tak dekhun

manta hun ki hai zulmat-e-azal us ka nasib

raat ki zid hai use apni fughan tak dekhun

ye bhi aslaf ki tahzib hai 'azhar' main yahan

apna kirdar tamam amn-e-aman tak dekhun