shahr mein ganw ke logon ki tarah rahte hain

shahr meñ gaañv ke logoñ kī tarah rahte haiñ

ham ki mā'sūm parindoñ kī tarah rahte haiñ

zulmat-e-shab meñ charāġhoñ ki tarah rahte haiñ

ham añdheroñ meñ ujāloñ kī tarah rahte haiñ

'aish-o-'ishrat meñ magan rahte ho tum to har dam

hukmrāñ vo jo faqīroñ kī tarah rahte haiñ

har ghaḌī aatī hai kirdār se ḳhush-bū jin ke

gulshan-e-hind meñ phūloñ kī tarah rahte haiñ

jin ke siine meñ hai be-laus mohabbat kī chamak

vo hī kuchh log ujāloñ kī tarah rahte haiñ

vaqt ke saath jo tabdīl nahīñ ho paate

apne logoñ meñ parāyoñ kī tarah rahte haiñ

chāhe āñgan meñ raheñ yā kisī sahrā meñ 'vasīm'

ham samar-dār daraḳhtoñ kī tarah rahte haiñ

shahr mein ganw ke logon ki tarah rahte hain

hum ki ma'sum parindon ki tarah rahte hain

zulmat-e-shab mein charaghon ki tarah rahte hain

hum andheron mein ujalon ki tarah rahte hain

'aish-o-'ishrat mein magan rahte ho tum to har dam

hukmran wo jo faqiron ki tarah rahte hain

har ghaDi aati hai kirdar se KHush-bu jin ke

gulshan-e-hind mein phulon ki tarah rahte hain

jin ke sine mein hai be-laus mohabbat ki chamak

wo hi kuchh log ujalon ki tarah rahte hain

waqt ke sath jo tabdil nahin ho pate

apne logon mein parayon ki tarah rahte hain

chahe aangan mein rahen ya kisi sahra mein 'wasim'

hum samar-dar daraKHton ki tarah rahte hain