shahr sahra hai ghar bayaban hai

shahr sahrā hai ghar bayābāñ hai

dil kisī anjuman kā ḳhvāhāñ hai

mujh se kahtī haiñ vo udaas āñhkeñ

zindagī bhar kī sab thakan yaañ hai

ḳhvāb TuuTe paḌe haiñ sab mere

maiñ huuñ aur hairatoñ kā sāmāñ hai

har masarrat guñdhī huī dukh meñ

arz-e-azdād dasht-e-imkāñ hai

tū samundar kī be-kanārī dekh

us meñ me.ār-e-zarf pinhāñ hai

haiñ ravā saare nā-ravā us ko

ye na.e mausamoñ kā insāñ hai

mar ke pahuñchā to huuñ lab-e-dariyā

ḳhālī ab tishnagī kā dāmāñ hai

sab ne 'shāhid' chune pasand ke phuul

gul-kada phir bhī gul-ba-dāmāñ hai

shahr sahra hai ghar bayaban hai

dil kisi anjuman ka KHwahan hai

mujh se kahti hain wo udas aanhken

zindagi bhar ki sab thakan yan hai

KHwab TuTe paDe hain sab mere

main hun aur hairaton ka saman hai

har masarrat gundhi hui dukh mein

arz-e-azdad dasht-e-imkan hai

tu samundar ki be-kanari dekh

us mein mear-e-zarf pinhan hai

hain rawa sare na-rawa us ko

ye nae mausamon ka insan hai

mar ke pahuncha to hun lab-e-dariya

KHali ab tishnagi ka daman hai

sab ne 'shahid' chune pasand ke phul

gul-kada phir bhi gul-ba-daman hai