shajar har ek hari gahri qaba pahne hue hai

shajar har ik harī gahrī qabā pahne hue hai

nayā mausam na.ī taaza havā pahne hue hai

na jaane kaun sā saayā hai jis se ḳhauf khā kar

laboñ par har koī harf-e-duā pahne hue hai

añgūThī kah rahe haiñ sab jise kab jānte haiñ

ki vo unglī meñ ye kis kī razā pahne hue hai

hai sar par noch khāne ke liye tayyār duniyā

magar āñkhoñ meñ to ab tak hayā pahne hue hai

nazar vāloñ ko bilkul bhī nazar aatā nahīñ ye

na jaane kaun sā pardā ḳhudā pahne hue hai

sunā.ī hī kahāñ detī hai ab duniyā ye us ko

ki vo kānoñ meñ bas merī sadā pahne hue hai

ta'alluq ko nibhānā aur bhī dushvār hogā

agar donoñ meñ koī ik anā pahne hue hai

shajar har ek hari gahri qaba pahne hue hai

naya mausam nai taza hawa pahne hue hai

na jaane kaun sa saya hai jis se KHauf kha kar

labon par har koi harf-e-dua pahne hue hai

anguThi kah rahe hain sab jise kab jaante hain

ki wo ungli mein ye kis ki raza pahne hue hai

hai sar par noch khane ke liye tayyar duniya

magar aankhon mein to ab tak haya pahne hue hai

nazar walon ko bilkul bhi nazar aata nahin ye

na jaane kaun sa parda KHuda pahne hue hai

sunai hi kahan deti hai ab duniya ye us ko

ki wo kanon mein bas meri sada pahne hue hai

ta'alluq ko nibhana aur bhi dushwar hoga

agar donon mein koi ek ana pahne hue hai