shajar pe sanp hai ya bagh mein shikari hai

shajar pe saañp hai yā baaġh meñ shikārī hai

ye kaisī aaj parindoñ meñ be-qarārī hai

tumhāre lab pe thiiñ kal inqalāb kī bāteñ

tumhāre lab pe to girya hai āh-o-zārī hai

ajab na thā saf-e-avval meñ ham nazar aate

magar ye raah meñ haa.il jo ḳhāksārī hai

ye ma.arke to siyāsat ke shāḳhsāne haiñ

na tū ne jiitī hai baazī na maiñ ne haarī hai

koī guzāre to do din meñ jaan se guzre

jo umr ham ne ġham-e-yār meñ guzārī hai

hamāre haal pe un kī ināyateñ kam thiiñ

jo dil pe ab ke lagā hai vo zaḳhm kaarī hai

kuchh aise naam haiñ sher-o-suḳhan kī duniyā meñ

ki jin kī dhuum haqīqat meñ ishtihārī hai

shajar pe sanp hai ya bagh mein shikari hai

ye kaisi aaj parindon mein be-qarari hai

tumhaare lab pe thin kal inqalab ki baaten

tumhaare lab pe to girya hai aah-o-zari hai

ajab na tha saf-e-awwal mein hum nazar aate

magar ye rah mein hail jo KHaksari hai

ye marke to siyasat ke shaKHsane hain

na tu ne jiti hai bazi na main ne haari hai

koi guzare to do din mein jaan se guzre

jo umr hum ne gham-e-yar mein guzari hai

hamare haal pe un ki inayaten kam thin

jo dil pe ab ke laga hai wo zaKHm kari hai

kuchh aise nam hain sher-o-suKHan ki duniya mein

ki jin ki dhum haqiqat mein ishtihaari hai