karne do agar qattal jahan talwar ki baaten karte hain

karne do agar qattāl jahāñ talvār kī bāteñ karte haiñ

arzāñ nahīñ hotā un kā lahū jo pyaar kī bāteñ karte haiñ

ye 'aish-o-tarab ke matvāle be-kār kī bāteñ karte haiñ

paa.el ke ġhamoñ kā 'ilm nahīñ jhankār kī bāteñ karte haiñ

is zahr bharī duniyā meñ jinheñ apnā bhī maraz mā'lūm nahīñ

aksar vo ba-zo'm-e-chāra-garī bīmār kī bāteñ karte haiñ

nā-haq hai havas ke bandoñ ko nazzāra-e-fitrat kā dā'vā

āñkhoñ meñ nahīñ hai betābi dīdār kī bāteñ karte haiñ

ġham meñ bhī rahā ehsās-e-tarab dekho to hamārī zindānī

vīrāne meñ saarī 'umr kaTī gulzār kī bāteñ karte haiñ

andāza agar karnā ho kabhī kuchh tang-nazar insānoñ kā

hai un kī faqat pahchān yahī pindār kī bāteñ karte haiñ

be-naqd-e-amal jannat kī talab kyā shai haiñ janāb-e-vā'iz bhī

muTThī meñ nahīñ haiñ dām-o-diram bāzār kī bāteñ karte haiñ

kahte haiñ unhīñ ko dushman-e-dil hai naam inhīñ kā nāseh bhī

vo log jo rah kar sāhil par mañjdhār kī bāteñ karte haiñ

pahuñche haiñ jo apnī manzil par un ko to nahīñ kuchh nāz-e-safar

chalne kā jinheñ maqdūr nahīñ raftār kī bāteñ karte haiñ

ye ahl-e-qalam ye ahl-e-hunar dekho to 'shakīl' un sab ke jigar

fāqoñ se haiñ dil murjhā.e hue dil-dār kī bāteñ karte haiñ

karne do agar qattal jahan talwar ki baaten karte hain

arzan nahin hota un ka lahu jo pyar ki baaten karte hain

ye 'aish-o-tarab ke matwale be-kar ki baaten karte hain

pael ke ghamon ka 'ilm nahin jhankar ki baaten karte hain

is zahr bhari duniya mein jinhen apna bhi maraz ma'lum nahin

aksar wo ba-zo'm-e-chaara-gari bimar ki baaten karte hain

na-haq hai hawas ke bandon ko nazzara-e-fitrat ka da'wa

aankhon mein nahin hai betabi didar ki baaten karte hain

gham mein bhi raha ehsas-e-tarab dekho to hamari zindani

virane mein sari 'umr kaTi gulzar ki baaten karte hain

andaza agar karna ho kabhi kuchh tang-nazar insanon ka

hai un ki faqat pahchan yahi pindar ki baaten karte hain

be-naqd-e-amal jannat ki talab kya shai hain janab-e-wa'iz bhi

muTThi mein nahin hain dam-o-diram bazar ki baaten karte hain

kahte hain unhin ko dushman-e-dil hai nam inhin ka naseh bhi

wo log jo rah kar sahil par manjdhaar ki baaten karte hain

pahunche hain jo apni manzil par un ko to nahin kuchh naz-e-safar

chalne ka jinhen maqdur nahin raftar ki baaten karte hain

ye ahl-e-qalam ye ahl-e-hunar dekho to 'shakil' un sab ke jigar

faqon se hain dil murjhae hue dil-dar ki baaten karte hain