shama par shama jalati hui sath aati hai

sham.a par sham.a jalātī huī saath aatī hai

raat aatī hai ki yādoñ kī barāt aatī hai

ik zarā kūcha-e-jānāñ meñ Thahar jā ai maut

ḳhair-maqdam ke liye merī hayāt aatī hai

pher lete haiñ nigāheñ tire pyāse hañs kar

jaam par jaam liye mauj-e-furāt aatī hai

qissa-e-dair-o-haram aur se pūchho logo

ham to shā.ir haiñ hameñ pyaar kī baat aatī hai

hoshiyār ai dil-e-betāb ki maqtal hai qarīb

āḳhirī manzil-e-taslīm-o-sibāt aatī hai

jagmagāte hue mahloñ kī taraf to dekho

un kī duniyā meñ din aatā hai ki raat aatī hai

jis se ban jaatī hai bigḌī huī qismat ai dost

aisī tadbīr bhī taqdīr se haath aatī hai

tishna-kāmān-e-mohabbat se kaho sabr kareñ

maut hāthoñ meñ liye āb-e-hayāt aatī hai

muskurāhaT nahīñ aatī lab-e-sāqī pe 'shamīm'

ġham-e-daurāñ ke liye sub.h-e-najāt aatī hai

shama par shama jalati hui sath aati hai

raat aati hai ki yaadon ki baraat aati hai

ek zara kucha-e-jaanan mein Thahar ja ai maut

KHair-maqdam ke liye meri hayat aati hai

pher lete hain nigahen tere pyase hans kar

jam par jam liye mauj-e-furaat aati hai

qissa-e-dair-o-haram aur se puchho logo

hum to shair hain hamein pyar ki baat aati hai

hoshiyar ai dil-e-betab ki maqtal hai qarib

aaKHiri manzil-e-taslim-o-sibaat aati hai

jagmagate hue mahlon ki taraf to dekho

un ki duniya mein din aata hai ki raat aati hai

jis se ban jati hai bigDi hui qismat ai dost

aisi tadbir bhi taqdir se hath aati hai

tishna-kaaman-e-mohabbat se kaho sabr karen

maut hathon mein liye aab-e-hayat aati hai

muskurahaT nahin aati lab-e-saqi pe 'shamim'

gham-e-dauran ke liye subh-e-najat aati hai