sharm-ālūd kahīñ dīda-e-ġhammāz na ho
dilbarī kā koī pahlū nazar-andāz na ho
duur se dard-bharī ek sadā aatī hai
mere TuuTe hue dil kī kahīñ āvāz na ho
lazzat-e-dard kā mahjūr sahārā kyuuñ leñ
lutf-e-tanhā.ī to jab hai koī dam-sāz na ho
shukr sad shukr ki ai shauq mirā tā.ir-e-dil
bāl-o-par hote hue mā.il-e-parvāz na ho
muntazir bazm hai aa jaa.eñ ba-sad ishva-e-nāz
shart ye hai ki nigāh-e-ġhalat-andāz na ho
ye bhī kyā daur hai nairañgī-e-ālam terā
murġh-e-āsūda chaman zamzama-parvāz na ho
kasrat-e-jalva meñ gum hai dil-e-hañgāma-faroz
be-ḳhudī kahtī hai merā koī hamrāz na ho
sar-e-maqtal koī is shaan se aa.e ai 'shauq'
lab pe e'jāz na ho chashm fusūñ-sāz na ho
sharm-alud kahin dida-e-ghammaz na ho
dilbari ka koi pahlu nazar-andaz na ho
dur se dard-bhari ek sada aati hai
mere TuTe hue dil ki kahin aawaz na ho
lazzat-e-dard ka mahjur sahaara kyun len
lutf-e-tanhai to jab hai koi dam-saz na ho
shukr sad shukr ki ai shauq mera tair-e-dil
baal-o-par hote hue mail-e-parwaz na ho
muntazir bazm hai aa jaen ba-sad ishwa-e-naz
shart ye hai ki nigah-e-ghalat-andaz na ho
ye bhi kya daur hai nairangi-e-alam tera
murgh-e-asuda chaman zamzama-parwaz na ho
kasrat-e-jalwa mein gum hai dil-e-hangama-faroz
be-KHudi kahti hai mera koi hamraaz na ho
sar-e-maqtal koi is shan se aae ai 'shauq'
lab pe e'jaz na ho chashm fusun-saz na ho
Source:
Payam-e-Shauq (Pg. 161)
-
Author:
Jagmohan Nath Reena Shauq
-
- Publisher: Nizami Press, Badaun
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.