sharmindagī-e-dil ko chhupāoge kahāñ tak
aahoñ kī rasā.ī hai zamīñ aur zamāñ tak
bin us ke hai dushvār yahāñ saañs bhī lenā
aayā hai koī dil meñ utar kar rag-e-jāñ tak
kānoñ meñ vo amrit sā utar jaatā hai ban kar
tāsīr masīhā.ī kī aa.e jo zabāñ tak
har dil meñ tamannā to har ik aañkh meñ hasrat
shaidā.ī-e-ulfat hai yahāñ pīr-o-javāñ tak
mahrūm nazar hai mirā zaḳhmoñ se bharā dil
hāsil hai hameñ daad faqat zor-e-bayāñ tak
gardan ye kisī taur kabhī bach na sakegī
aa jā.egī jis roz qazā nok-e-sināñ tak
jis roz yaqīñ aa.egā mar jā.eñge us din
rahne do mohabbat ko yūñhī vahm-o-gumāñ tak
sharmindagi-e-dil ko chhupaoge kahan tak
aahon ki rasai hai zamin aur zaman tak
bin us ke hai dushwar yahan sans bhi lena
aaya hai koi dil mein utar kar rag-e-jaan tak
kanon mein wo amrit sa utar jata hai ban kar
tasir masihai ki aae jo zaban tak
har dil mein tamanna to har ek aankh mein hasrat
shaidai-e-ulfat hai yahan pir-o-jawan tak
mahrum nazar hai mera zaKHmon se bhara dil
hasil hai hamein dad faqat zor-e-bayan tak
gardan ye kisi taur kabhi bach na sakegi
aa jaegi jis roz qaza nok-e-sinan tak
jis roz yaqin aaega mar jaenge us din
rahne do mohabbat ko yunhi wahm-o-guman tak
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.