shart-e-dīvār-o-dar-o-bām uThā dī hai to kyā
qaid phir qaid hai zanjīr baḌhā dī hai to kyā
ab bhī tan teġh se laḌ jaa.e to chhan boltā hai
vaqt ne is pe agar dhuul jamā dī hai to kyā
mere ḳhusrav ne mujhe ġham bhī ziyāda baḳhshā
daulat-e-ishq agar mujh ko sivā dī hai to kyā
ham bhī tayyār haiñ phir jaan luTāne ke liye
sāmne phir vahī kuufa vahī vaadī hai to kyā
mujrim-e-dil ko kahāñ faisla sunñe kā dimāġh
us ne baḳhshā hai to kyā aur sazā dī hai to kyā
shart-e-diwar-o-dar-o-baam uTha di hai to kya
qaid phir qaid hai zanjir baDha di hai to kya
ab bhi tan tegh se laD jae to chhan bolta hai
waqt ne is pe agar dhul jama di hai to kya
mere KHusraw ne mujhe gham bhi ziyaada baKHsha
daulat-e-ishq agar mujh ko siwa di hai to kya
hum bhi tayyar hain phir jaan luTane ke liye
samne phir wahi kufa wahi wadi hai to kya
mujrim-e-dil ko kahan faisla sunne ka dimagh
us ne baKHsha hai to kya aur saza di hai to kya
Source:
Ghazal Ke Rang (Pg. 47)
-
Author:
Akram Naqqash, Sohil Akhtar
-
- Edition: 2014
- Publisher: Aflaak Publications, Gulbarga
- Year of Publication: 2014
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.