sharteñ jo bandagī meñ lagānā ravā huā
ai vā.izoñ namāz na Thahrī juā huā
ubhrā jo rū-siyāh tunuk-zarf kyā huā
had se sivā jo ḳhaal huā vo masā huā
pūchho na kū-e-yār-e-adam kī musāfiro
Dharrā hai sū-e-gor-e-garībāñ lagā huā
sūkhā havā-e-ġham se jo kuchh tāzgī huī
maiñ vo shajar huuñ ḳhushk huā jab harā huā
saanī muhāl hai sanam-e-lā-javāb kā
paidā koī ḳhudā kā nahīñ dūsrā huā
misl-e-habāb dam meñ fanā ho jo aadmī
paanī kā bulbula na huā aur kyā huā
vo dil-jalā huuñ jis meñ mirī ḳhaak mil ga.ī
jo naḳhl is zamīñ pe huā aag kā huā
nāḳhun-ḳharāshiyoñ se jarāhat jo baḌh chale
nāsūr aur zaḳhm-e-kuhan meñ sivā huā
hañste to gul-ruḳhoñ se haiñ misl-e-dahān-e-zaḳhm
lekin hai aable kī tarah dil dukhā huā
sākit zabān ho ga.ī ai 'shād' marte dam
kyā band andalīb mirā boltā huā
sharten jo bandagi mein lagana rawa hua
ai waizon namaz na Thahri jua hua
ubhra jo ru-siyah tunuk-zarf kya hua
had se siwa jo KHal hua wo masa hua
puchho na ku-e-yar-e-adam ki musafiro
Dharra hai su-e-gor-e-gariban laga hua
sukha hawa-e-gham se jo kuchh tazgi hui
main wo shajar hun KHushk hua jab hara hua
sani muhaal hai sanam-e-la-jawab ka
paida koi KHuda ka nahin dusra hua
misl-e-habab dam mein fana ho jo aadmi
pani ka bulbula na hua aur kya hua
wo dil-jala hun jis mein meri KHak mil gai
jo naKHl is zamin pe hua aag ka hua
naKHun-KHarashiyon se jarahat jo baDh chale
nasur aur zaKHm-e-kuhan mein siwa hua
hanste to gul-ruKHon se hain misl-e-dahan-e-zaKHm
lekin hai aable ki tarah dil dukha hua
sakit zaban ho gai ai 'shad' marte dam
kya band andalib mera bolta hua
Source:
Sukhan-e-Bemisal: Deewan-e-Shad (pdf) and website (Pg. p-20 e-26 pdf-27)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.