shashdar-o-hairan hai jo bhi KHaridaron mein hai

shashdar-o-hairān hai jo bhī ḳharīdāroñ meñ hai

ik sukūt-e-bekarāñ har samt bāzāroñ meñ hai

naubat-e-qaht-e-masīhā.ī yahāñ tak aa ga.ī

kuchh dinoñ se ārzū-e-marg bīmāroñ meñ hai

vo bhī kyā din the ki jab har vasf ik e'zāz thā

aaj to 'azmat qabāoñ aur dastāroñ meñ hai

uḌ rahe haiñ rañg phūloñ ke faqat is baat par

iltifāt-e-fasl-e-gul kā zikr kyuuñ ḳhāroñ meñ hai

ai mire nāqid mire ash'ār kam-pāya sahī

kam se kam iblāġh to mere suḳhan-pāroñ meñ hai

bujh nahīñ saktī kisī sūrat havas kī tishnagī

bahr-e-be-pāyāñ bhī bārish ke talab-gāroñ meñ hai

ḳhūb-sūrat shakl meñ ham sab darinde haiñ 'asad'

aadmī kahte haiñ jis ko vo abhī ġhāroñ meñ hai

shashdar-o-hairan hai jo bhi KHaridaron mein hai

ek sukut-e-bekaran har samt bazaron mein hai

naubat-e-qaht-e-masihai yahan tak aa gai

kuchh dinon se aarzu-e-marg bimaron mein hai

wo bhi kya din the ki jab har wasf ek e'zaz tha

aaj to 'azmat qabaon aur dastaron mein hai

uD rahe hain rang phulon ke faqat is baat par

iltifat-e-fasl-e-gul ka zikr kyun KHaron mein hai

ai mere naqid mere ash'ar kam-paya sahi

kam se kam iblagh to mere suKHan-paron mein hai

bujh nahin sakti kisi surat hawas ki tishnagi

bahr-e-be-payan bhi barish ke talab-garon mein hai

KHub-surat shakl mein hum sab darinde hain 'asad'

aadmi kahte hain jis ko wo abhi ghaaron mein hai