shauq-e-baqa ka aapne kitna hasin sila diya

shauq-e-baqā kā aap ne kitnā hasīñ sila diyā

ḳhaak hī se banā thā maiñ ḳhaak meñ phir milā diyā

chashm-e-karishma saaz kī ye bhī hai ik ḳhusūsiyat

chāhā jise banā diyā chāhā jise miTā diyā

mujh se agar huī thī bhuul aap ne kyoñ kiyā qusūr

kyoñ merā haal dekh kar bazm meñ muskurā diyā

aañkh ko de ke zauq-e-rañg ḳhud huā rañg se pare

sho.abada-e-girya tū ne ḳhuub diid kā hausla diyā

'tarzī' abhī to ye fuġhāñ ban hī rahī hai dāstāñ

dil meñ thā raaz ik nihāñ sher koī sunā diyā

shauq-e-baqa ka aap ne kitna hasin sila diya

KHak hi se bana tha main KHak mein phir mila diya

chashm-e-karishma saz ki ye bhi hai ek KHususiyat

chaha jise bana diya chaha jise miTa diya

mujh se agar hui thi bhul aap ne kyon kiya qusur

kyon mera haal dekh kar bazm mein muskura diya

aankh ko de ke zauq-e-rang KHud hua rang se pare

shoabada-e-girya tu ne KHub did ka hausla diya

'tarzi' abhi to ye fughan ban hi rahi hai dastan

dil mein tha raaz ek nihan sher koi suna diya