shauq-e-KHwabida wo bedar bhi kar deta hai

shauq-e-ḳhvābīda vo bedār bhī kar detā hai

havas-e-zīst se sarshār bhī kar detā hai

husn-e-be-dāġh kī bas ek jhalak dikhlā kar

vāqif-e-lazzat-e-takrār bhī kar detā hai

pahle vo Dāltā hai aag ke dariyāoñ meñ

phir usī aag ko gulzār bhī kar detā hai

raat bhar kartā hai vo din ke nikalne kī duā

sub.h-dam raushnī mismār bhī kar detā hai

qissa-e-afv-o-guzārish ke tasalsul ke liye

be-ḳhatāoñ ko ḳhatā-kār bhī kar detā hai

ḳhud hī rakhtā hai diye tez havā kī zad par

aur āñdhī se ḳhabar-dār bhī kar detā hai

kabhī sikhlātā hai vo sulh-o-safā.ī ke hunar

kabhī ḳhud barsar-e-paikār bhī kar detā hai

kabhī kartā hai nichhāvar mirī rāhoñ meñ phuul

vaqt mil jaa.e to pur-ḳhār bhī kar detā hai

inkisārī ke sabhī raaz batā kar mujh ko

yak-ba-yak mā.il-e-pindār bhī kar detā hai

pahle kartā hai vo āmāda gunāhoñ pe 'farīd'

phir us ik baat kā iz.hār bhī kar detā hai

shauq-e-KHwabida wo bedar bhi kar deta hai

hawas-e-zist se sarshaar bhi kar deta hai

husn-e-be-dagh ki bas ek jhalak dikhla kar

waqif-e-lazzat-e-takrar bhi kar deta hai

pahle wo Dalta hai aag ke dariyaon mein

phir usi aag ko gulzar bhi kar deta hai

raat bhar karta hai wo din ke nikalne ki dua

subh-dam raushni mismar bhi kar deta hai

qissa-e-afw-o-guzarish ke tasalsul ke liye

be-KHataon ko KHata-kar bhi kar deta hai

KHud hi rakhta hai diye tez hawa ki zad par

aur aandhi se KHabar-dar bhi kar deta hai

kabhi sikhlata hai wo sulh-o-safai ke hunar

kabhi KHud barsar-e-paikar bhi kar deta hai

kabhi karta hai nichhawar meri rahon mein phul

waqt mil jae to pur-KHar bhi kar deta hai

inkisari ke sabhi raaz bata kar mujh ko

yak-ba-yak mail-e-pindar bhi kar deta hai

pahle karta hai wo aamada gunahon pe 'farid'

phir us ek baat ka izhaar bhi kar deta hai