shauq ke daftar dilon mein rah gae

shauq ke daftar diloñ meñ rah ga.e

garche āshiq dāstāneñ kah ga.e

dil meñ ḳhud un ke bhī chubh kar rah ga.e

vo nazar ke tiir jo ham sah ga.e

mehrbānī aap kī yādash-ba-ḳhair

vaqt kī maujoñ meñ aalam bah ga.e

thā tirī nazroñ meñ vo jaadū ki ham

jo na kahnā chāhte the kah ga.e

thī junūñ-āmez apnī guftugū

baat matlab kī bhī lekin kah ga.e

naza.a tak dil us ko dohrāyā kiyā

ik tabassum meñ vo kyā kuchh kah ga.e

aaj vo mahfil meñ 'maikash' kī tarah

kuchh na bole aur sab kuchh kah ga.e

shauq ke daftar dilon mein rah gae

garche aashiq dastanen kah gae

dil mein KHud un ke bhi chubh kar rah gae

wo nazar ke tir jo hum sah gae

mehrbani aap ki yaadash-ba-KHair

waqt ki maujon mein aalam bah gae

tha teri nazron mein wo jadu ki hum

jo na kahna chahte the kah gae

thi junun-amez apni guftugu

baat matlab ki bhi lekin kah gae

naza tak dil us ko dohraya kiya

ek tabassum mein wo kya kuchh kah gae

aaj wo mahfil mein 'maikash' ki tarah

kuchh na bole aur sab kuchh kah gae