sher mere kahan the kisi ke liye

sher mere kahāñ the kisī ke liye

maiñ ne sab kuchh likhā hai tumhāre liye

apne dukh sukh bahut ḳhūb-sūrat rahe

ham jiye bhī to ik dūsre ke liye

ham-safar ne mirā saath chhoḌā nahīñ

apne aañsū diye rāste ke liye

is havelī meñ ab koī rahtā nahīñ

chāñd niklā kise dekhne ke liye

zindagī aur maiñ do alag to nahīñ

maiñ ne sab phuul kāñTe isī se liye

shahr meñ ab mirā koī dushman nahīñ

sab ko apnā liyā maiñ ne tere liye

zehn meñ titliyāñ uḌ rahī haiñ bahut

koī dhāga nahīñ bāñdhne ke liye

ek tasvīr ġhazloñ meñ aisī banī

agle pichhle zamānoñ ke chehre liye

sher mere kahan the kisi ke liye

main ne sab kuchh likha hai tumhaare liye

apne dukh sukh bahut KHub-surat rahe

hum jiye bhi to ek dusre ke liye

ham-safar ne mera sath chhoDa nahin

apne aansu diye raste ke liye

is haweli mein ab koi rahta nahin

chand nikla kise dekhne ke liye

zindagi aur main do alag to nahin

main ne sab phul kanTe isi se liye

shahr mein ab mera koi dushman nahin

sab ko apna liya main ne tere liye

zehn mein titliyan uD rahi hain bahut

koi dhaga nahin bandhne ke liye

ek taswir ghazlon mein aisi bani

agle pichhle zamanon ke chehre liye