shikayat bewafai ki na kar duniya-e-fani mein

shikāyat bevafā.ī kī na kar duniyā-e-fānī meñ

vafā kā naam baaqī hai faqat qisse kahānī meñ

jo marnā thā to āḳhir kyoñ na maut i javānī meñ

dil-e-zinda ko baiThā ro rahā huuñ zindagānī meñ

kisī ke gosha-e-abrū se kyā irshād hotā hai

koī kuchh arz kartā hai zabān-e-be-zabānī meñ

vufūr-e-shauq merā māne-e-dīdār thā varna

jhalak thī ḳhud-numā.ī kī sadā-e-lan-tarānī meñ

fusūn-e-shauq baḌh kar ho gayā afsāna-e-rañgīñ

jigar kā ḳhuun jab hal ho gayā ashkoñ ke paanī meñ

mohabbat hī ḳhudā-e-lam-yazal mālūm hotī hai

isī ko to baqā hāsil hai is duniyā-e-fānī meñ

chaman meñ zindagānī ke bahār aa.ī ḳhizāñ ban kar

mohabbat ne lagā.ī aag dil ko naujavānī meñ

ta.ajjub kyā agar mujh ko mohabbat phir javāñ kar de

jhalak hai husn-e-yūsuf kī zuleḳhā kī javānī meñ

jo dil meñ dard uThtā hai to 'beḳhud' sher kahtā hai

madad ashkoñ se miltī hai tabī.at ko ravānī meñ

shikayat bewafai ki na kar duniya-e-fani mein

wafa ka nam baqi hai faqat qisse kahani mein

jo marna tha to aaKHir kyon na maut i jawani mein

dil-e-zinda ko baiTha ro raha hun zindagani mein

kisi ke gosha-e-abru se kya irshad hota hai

koi kuchh arz karta hai zaban-e-be-zabani mein

wufur-e-shauq mera mane-e-didar tha warna

jhalak thi KHud-numai ki sada-e-lan-tarani mein

fusun-e-shauq baDh kar ho gaya afsana-e-rangin

jigar ka KHun jab hal ho gaya ashkon ke pani mein

mohabbat hi KHuda-e-lam-yazal malum hoti hai

isi ko to baqa hasil hai is duniya-e-fani mein

chaman mein zindagani ke bahaar aai KHizan ban kar

mohabbat ne lagai aag dil ko naujawani mein

tajjub kya agar mujh ko mohabbat phir jawan kar de

jhalak hai husn-e-yusuf ki zuleKHa ki jawani mein

jo dil mein dard uThta hai to 'beKHud' sher kahta hai

madad ashkon se milti hai tabiat ko rawani mein