shikayat karen kya shikayat se kya ho

shikāyat kareñ kyā shikāyat se kyā ho

agar jañg lāzim hai to hausla ho

bashar kā to itnā na dil saaf hogā

tum insāñ kī sūrat meñ jaise ḳhudā ho

ye sarkash samundar nikal pāoge jab

junūñ saañs lene kā sar par chaḌhā ho

mohabbat meñ ho to bas itnā kahūñgā

maza chaar din kā hai lambī sazā ho

koī har musībat se ham ko nikāle

asar kar rahī dostoñ kī duā ho

ye parvāz kā ḳhvāb achchhā hai lekin

zarā pahle qadmoñ pe apne khaḌā ho

siyāsat se ham ko tumheñ kyā milegā

ye dhanda hai jis kā usī kā bhalā ho

tabassum ki pīchhe kahīñ kuchh chhupā hai

hameñ sab patā hai tum ham se ḳhafā ho

abhī jo bhī miltā hai taslīm kar lo

phir aage safar meñ na jaane ki kyā ho

shikayat karen kya shikayat se kya ho

agar jang lazim hai to hausla ho

bashar ka to itna na dil saf hoga

tum insan ki surat mein jaise KHuda ho

ye sarkash samundar nikal paoge jab

junun sans lene ka sar par chaDha ho

mohabbat mein ho to bas itna kahunga

maza chaar din ka hai lambi saza ho

koi har musibat se hum ko nikale

asar kar rahi doston ki dua ho

ye parwaz ka KHwab achchha hai lekin

zara pahle qadmon pe apne khaDa ho

siyasat se hum ko tumhein kya milega

ye dhanda hai jis ka usi ka bhala ho

tabassum ki pichhe kahin kuchh chhupa hai

hamein sab pata hai tum hum se KHafa ho

abhi jo bhi milta hai taslim kar lo

phir aage safar mein na jaane ki kya ho