shikayat se gharaz kya muddaa kya

shikāyat se ġharaz kyā mudda.ā kyā

nahīñ to dost dushman kā gilā kyā

na aayā nāma-bar ghabrā rahā huuñ

nahīñ ma.alūm kyā guzrī huā kyā

bahut achchhī nihāyat ḳhuub guzrī

ajī āfat-zadoñ kā pūchhnā kyā

na do mujh ko mubārakbād be-sūd

burī taqdīr vāloñ kā bhalā kyā

ye kyuuñ chitvan phirī kyuuñ aañkh badlī

bhalā maiñ ne qusūr aisā kiyā kyā

kab us kūche meñ Thahregī mirī ḳhaak

na hogā koī ehsān-e-havā kyā

umiid us se ġhalat samjhā ye o dil

sitamgar se tamannā-e-vafā kyā

baḌhā kar haath leñ un ko ye mushkil

nasīb aise mubārak phir duā kyā

na ghabrāo ajī karvaT na badlo

irāde haiñ abhī ḳhātir meñ kyā kyā

ye kab tak pārsā.ī āshiqoñ se

mohabbat hai to phir ham se hayā kyā

jigar paanī hai sadmoñ se lahū dil

mire siine meñ o zālim rahā kyā

kiyā hotā koī ehsāñ to zālim

kareñge shukr terā ham adā kyā

nahīñ mumkin ki tujh ko rahm aa.e

vo maiñ kyā aur merī iltijā kyā

ma.āz-allāh gar hai naujavānī

rahoge umr-bhar tum pārsā kyā

kahāñ hai dard dil meñ jo kaho haa.e

mazā degā hamārā mājrā kyā

kise dekhā ki bholā aap ko bhī

ta.ajjub hai ye mujh ko ho gayā kyā

'nasīm' aao zarā tum bhī suno to

ye charchā ho rahā hai jā-ba-jā kyā

shikayat se gharaz kya muddaa kya

nahin to dost dushman ka gila kya

na aaya nama-bar ghabra raha hun

nahin malum kya guzri hua kya

bahut achchhi nihayat KHub guzri

aji aafat-zadon ka puchhna kya

na do mujh ko mubarakbaad be-sud

buri taqdir walon ka bhala kya

ye kyun chitwan phiri kyun aankh badli

bhala main ne qusur aisa kiya kya

kab us kuche mein Thahregi meri KHak

na hoga koi ehsan-e-hawa kya

umid us se ghalat samjha ye o dil

sitamgar se tamanna-e-wafa kya

baDha kar hath len un ko ye mushkil

nasib aise mubarak phir dua kya

na ghabrao aji karwaT na badlo

irade hain abhi KHatir mein kya kya

ye kab tak parsai aashiqon se

mohabbat hai to phir hum se haya kya

jigar pani hai sadmon se lahu dil

mere sine mein o zalim raha kya

kiya hota koi ehsan to zalim

karenge shukr tera hum ada kya

nahin mumkin ki tujh ko rahm aae

wo main kya aur meri iltija kya

maaz-allah gar hai naujawani

rahoge umr-bhar tum parsa kya

kahan hai dard dil mein jo kaho hae

maza dega hamara majra kya

kise dekha ki bhola aap ko bhi

tajjub hai ye mujh ko ho gaya kya

'nasim' aao zara tum bhi suno to

ye charcha ho raha hai ja-ba-ja kya