shikayaten na zamin se na aasman se hain

shikāyateñ na zamīñ se na āsmān se haiñ

ki ek 'umr se ham log be-zabān se haiñ

na ho jo shahr kī mānind būd-o-bāsh nahīñ

yahī bahut hai ki sahrā meñ ham amaan se haiñ

mirī tarah hadaf-e-ahd be-yaqīnī haiñ

ḳhud apne-āp se jo log bad-gumān se haiñ

ajiib haiñ tire kūche meñ basne vaale bhī

zamīñ pe rahte haiñ vābasta āsmān se haiñ

visāl-o-hijr kī ye tohmateñ saheñ kab tak

ham ahl-e-ishq ki bezār apnī jaan se haiñ

ye mo'jiza bhī ajab hai tire ta.alluq kā

jo log dushman-e-jāñ the vo mehrbān se haiñ

sulūk-e-ahl-e-jahāñ dil pe naqsh hai 'ḳhāvar'

jahāñ the zaḳhm vahāñ aaj bhī nishān se haiñ

shikayaten na zamin se na aasman se hain

ki ek 'umr se hum log be-zaban se hain

na ho jo shahr ki manind bud-o-bash nahin

yahi bahut hai ki sahra mein hum aman se hain

meri tarah hadaf-e-ahd be-yaqini hain

KHud apne-ap se jo log bad-guman se hain

ajib hain tere kuche mein basne wale bhi

zamin pe rahte hain wabasta aasman se hain

visal-o-hijr ki ye tohmaten sahen kab tak

hum ahl-e-ishq ki bezar apni jaan se hain

ye mo'jiza bhi ajab hai tere talluq ka

jo log dushman-e-jaan the wo mehrban se hain

suluk-e-ahl-e-jahan dil pe naqsh hai 'KHawar'

jahan the zaKHm wahan aaj bhi nishan se hain