shikast azmat-e-pindar le ke aae hain

shikast azmat-e-pindār le ke aa.e haiñ

ham apnī ruuh sar-e-dār le ke aa.e haiñ

bharosā TūTtā jaatā hai nā-ḳhudāoñ kā

safīne ke liye patvār le ke aa.e haiñ

ham is ke baad tumheñ mīThī niiñd bhī deñge

abhī to dīda-e-bedār le ke aa.e haiñ

safar meñ saa.e kī shāyad kahīñ zarūrat ho

ham apne kāñdhe pe dīvār le ke aa.e haiñ

vo dostī to nahīñ dostoñ kī fitrat hai

mire liye jo mire yaar le ke aa.e haiñ

chhurī baġhal meñ dabā.e hue haiñ vo 'āsī'

jo apne haath meñ kuchh haar le ke aa.e haiñ

shikast azmat-e-pindar le ke aae hain

hum apni ruh sar-e-dar le ke aae hain

bharosa TuTta jata hai na-KHudaon ka

safine ke liye patwar le ke aae hain

hum is ke baad tumhein miThi nind bhi denge

abhi to dida-e-bedar le ke aae hain

safar mein sae ki shayad kahin zarurat ho

hum apne kandhe pe diwar le ke aae hain

wo dosti to nahin doston ki fitrat hai

mere liye jo mere yar le ke aae hain

chhuri baghal mein dabae hue hain wo 'asi'

jo apne hath mein kuchh haar le ke aae hain