shikast-e-shisha-e-dil ki dawa main kya karta

shikast-e-shīsha-e-dil kī davā maiñ kyā kartā

tire alāva koī dūsrā maiñ kyā kartā

maiñ ġhota-zan thā tirī yaad ke samundar meñ

libās uThā ke koī le gayā maiñ kyā kartā

kisī ke jaam kī jhūTī sharāb kyuuñ piitā

tumhāre husn kī qātil adā maiñ kyā kartā

maiñ jab chalā mirī manzil bhī chal paḌī aage

hamārā kam na huā fāsla maiñ kyā kartā

har ek chiiz agar tere iḳhtiyār meñ hai

to maiñ ne hone diyā jo huā maiñ kyā kartā

hayāt-e-nau ke jazīre pe roknī paḌī naav

muḳhālifat pe tulī thī havā maiñ kyā kartā

mirī sarisht meñ inkār rakh diyā tū ne

to hukm māntā kaise bhalā maiñ kyā kartā

ye dil to ek zamāne se intizār meñ thā

tū aa ke baiThtā phir dekhtā maiñ kyā kartā

mirā to jo bhī thā sab kuchh tirā diyā huā thā

mire karīm tirā shukriya maiñ kyā kartā

shikast-e-shisha-e-dil ki dawa main kya karta

tere alawa koi dusra main kya karta

main ghota-zan tha teri yaad ke samundar mein

libas uTha ke koi le gaya main kya karta

kisi ke jam ki jhuTi sharab kyun pita

tumhaare husn ki qatil ada main kya karta

main jab chala meri manzil bhi chal paDi aage

hamara kam na hua fasla main kya karta

har ek chiz agar tere iKHtiyar mein hai

to main ne hone diya jo hua main kya karta

hayat-e-nau ke jazire pe rokni paDi naw

muKHalifat pe tuli thi hawa main kya karta

meri sarisht mein inkar rakh diya tu ne

to hukm manta kaise bhala main kya karta

ye dil to ek zamane se intizar mein tha

tu aa ke baiThta phir dekhta main kya karta

mera to jo bhi tha sab kuchh tera diya hua tha

mere karim tera shukriya main kya karta