shikast kha ke bhi kab hausle hain kam mere

shikast khā ke bhī kab hausle haiñ kam mere

mire kaTe hue hāthoñ meñ haiñ alam mere

panāh-gāh mujhe bhī to saur jaisī de

mirī talāsh meñ dushman haiñ tāza-dam mere

tujhe maiñ kaise batā.ūñ kahāñ se kaisā huuñ

ulajh rahe haiñ ba-dastūr pech-o-ḳham mere

kis āsmān kī vus.at talāsh karte hue

zamīñ se duur nikal aa.e haiñ qadam mere

tū ye savāl bhī ab dajla o furāt se pūchh

maiñ kyā batā.ūñ kahāñ luT ga.e haram mere

jamī rahī hai chaTānoñ pe barf sadiyoñ tak

to jā ke phir kahīñ patthar hue haiñ nam mere

shikast kha ke bhi kab hausle hain kam mere

mere kaTe hue hathon mein hain alam mere

panah-gah mujhe bhi to saur jaisi de

meri talash mein dushman hain taza-dam mere

tujhe main kaise bataun kahan se kaisa hun

ulajh rahe hain ba-dastur pech-o-KHam mere

kis aasman ki wusat talash karte hue

zamin se dur nikal aae hain qadam mere

tu ye sawal bhi ab dajla o furaat se puchh

main kya bataun kahan luT gae haram mere

jami rahi hai chaTanon pe barf sadiyon tak

to ja ke phir kahin patthar hue hain nam mere