shikast-KHurda ana ke ghulam sab hi the

shikast-ḳhurda anā ke ġhulām sab hī the

safoñ meñ hote khaḌe kyoñ imaam sab hī the

havas ke gesu-e-pechāñ se koī bach na sakā

faqīr ho ki ġhanī zer-e-dām sab hī the

paḌā jo ran to sipar sauñp dī ġhanīmoñ ko

gharoñ meñ apne magar be-niyām sab hī the

khulā hai raaz ye ahl-e-junūñ kī mahfil meñ

fasāna-hā-e-ḳhirad nā-tamām sab hī the

bachā sakā na use koī dast-e-qātil se

hisār bāñdhe hue ḳhās-o-ām sab hī the

kisī ke lab pe haqīqat na aa sakī khul kar

sharīk-e-bazm to yuuñ ḳhush-kalām sab hī the

bhalā zabān vahāñ kaise kholte 'nātiq'

jahāñ darīda-dahan be-lijām sab hī the

shikast-KHurda ana ke ghulam sab hi the

safon mein hote khaDe kyon imam sab hi the

hawas ke gesu-e-pechan se koi bach na saka

faqir ho ki ghani zer-e-dam sab hi the

paDa jo ran to sipar saunp di ghanimon ko

gharon mein apne magar be-niyam sab hi the

khula hai raaz ye ahl-e-junun ki mahfil mein

fasana-ha-e-KHirad na-tamam sab hi the

bacha saka na use koi dast-e-qatil se

hisar bandhe hue KHas-o-am sab hi the

kisi ke lab pe haqiqat na aa saki khul kar

sharik-e-bazm to yun KHush-kalam sab hi the

bhala zaban wahan kaise kholte 'natiq'

jahan darida-dahan be-lijam sab hi the