shikast-o-reKHt ki had se guzar gaya hun main

shikast-o-reḳht kī had se guzar gayā huuñ maiñ

sameT le koī aa kar bikhar gayā huuñ maiñ

koī sadā koī Thokar jagā sakī na mujhe

ye be-hisī kā fusūñ hai ki mar gayā huuñ maiñ

zamāna chashm-e-hiqārat se dekhtā hai mujhe

tirī nigāh se shāyad utar gayā huuñ maiñ

kisī bhī samt se miltā nahīñ surāġh koī

pata nahīñ ki kahāñ huuñ kidhar gayā huuñ maiñ

duā.eñ dete haiñ mere junūñ ko vīrāne

ujaḌ ke ḳhud unheñ ābād kar gayā huuñ maiñ

vo chand lamhoñ kā raqs-e-ġhubār hī samjho

jo rāh-e-zīst meñ aksar ubhar gayā huuñ maiñ

ye vāhima hī sahī phir bhī jā-e-ibrat hai

ki aap apne hī saa.e se Dar gayā huuñ maiñ

zabān-e-hāl se 'nātiq' ġhazal ke paikar maiñ

ta.assurāt ke tūfān bhar gayā huuñ maiñ

shikast-o-reKHt ki had se guzar gaya hun main

sameT le koi aa kar bikhar gaya hun main

koi sada koi Thokar jaga saki na mujhe

ye be-hisi ka fusun hai ki mar gaya hun main

zamana chashm-e-hiqarat se dekhta hai mujhe

teri nigah se shayad utar gaya hun main

kisi bhi samt se milta nahin suragh koi

pata nahin ki kahan hun kidhar gaya hun main

duaen dete hain mere junun ko virane

ujaD ke KHud unhen aabaad kar gaya hun main

wo chand lamhon ka raqs-e-ghubar hi samjho

jo rah-e-zist mein aksar ubhar gaya hun main

ye wahima hi sahi phir bhi ja-e-ibrat hai

ki aap apne hi sae se Dar gaya hun main

zaban-e-haal se 'natiq' ghazal ke paikar main

tassuraat ke tufan bhar gaya hun main