shikasta hawaon ko par de gaya

shikasta havāoñ ko par de gayā

parinda fazā kī ḳhabar de gayā

nazāroñ se kartā rahā jang vo

jo haarā to apnī nazar de gayā

jise Thīkre bhī na ham ne diye

vo lafzoñ ke lā’l-o-guhar de gayā

vo ḳhud to shajar hī rahā raah kā

magar dūsroñ ko samar de gayā

tirī bazm se surḳh-rū sab chale

jo nādār thā apnā sar de gayā

vo 'nūr' ek ruḳhsat kā mā’sūm ġham

musāfir ko zād-e-safar de gayā

shikasta hawaon ko par de gaya

parinda faza ki KHabar de gaya

nazaron se karta raha jang wo

jo haara to apni nazar de gaya

jise Thikre bhi na hum ne diye

wo lafzon ke la’l-o-guhar de gaya

wo KHud to shajar hi raha rah ka

magar dusron ko samar de gaya

teri bazm se surKH-ru sab chale

jo nadar tha apna sar de gaya

wo 'nur' ek ruKHsat ka ma’sum gham

musafir ko zad-e-safar de gaya