shikasta KHwabon ka aankhon se rabta kar len

shikasta ḳhvāboñ kā āñkhoñ se rābta kar leñ

har ek shab kā taqāzā ki rat-jagā kar leñ

lagā.eñ bhiiḌ ga.e zard-o-sabz lamhoñ kī

aur us hujūm meñ phir ḳhud ko lāpata kar leñ

vagarna jiine na degā ġham-e-hayāt kā zahr

kisī ke bhūle hue ġham kā phir nasha kar leñ

kuchh ehtijāj bhī rakkheñ sharīk-e-zabt-e-sitam

zabāñ hai gung to chehra savāliya kar leñ

vo zaḳhm dast-e-talab ho ki ho gul-e-shādāb

vo kuchh to degā hamīñ 'arz-e-mudda'ā kar leñ

nazar hai terī tavajjoh ke har tarashshoh par

paḌe phuvār to zaḳhmoñ ko phir harā kar leñ

dikhā.ī dene lagā ruḳh pe rañg-e-bātin bhī

bahut qarīb haiñ ham thoḌā fāsla kar leñ

shikasta KHwabon ka aankhon se rabta kar len

har ek shab ka taqaza ki rat-jaga kar len

lagaen bhiD gae zard-o-sabz lamhon ki

aur us hujum mein phir KHud ko lapata kar len

wagarna jine na dega gham-e-hayat ka zahr

kisi ke bhule hue gham ka phir nasha kar len

kuchh ehtijaj bhi rakkhen sharik-e-zabt-e-sitam

zaban hai gung to chehra sawaliya kar len

wo zaKHm dast-e-talab ho ki ho gul-e-shadab

wo kuchh to dega hamin 'arz-e-mudda'a kar len

nazar hai teri tawajjoh ke har tarashshoh par

paDe phuwar to zaKHmon ko phir hara kar len

dikhai dene laga ruKH pe rang-e-baatin bhi

bahut qarib hain hum thoDa fasla kar len