shikasta-pa hain koi aasra banate hain

shikasta-pā haiñ koī aasrā banāte haiñ

miTā ke ḳhud ko jo ham ik ḳhudā banāte haiñ

hameñ shu.ūr-e-haqīqat nahīñ so ham aksar

fareb-e-jumbish-e-bāl-e-humā banāte haiñ

vo apne husn kā har raaz kholne ke liye

qabā banāte haiñ band-e-qabā banāte haiñ

abad ke dosh pe sū-e-azal chale haiñ ki ham

nayā hī naqsh koī dahr kā banāte haiñ

ḳhudā-e-mausam-e-gul un ko tāzgī baḳhshe

jo dast-e-shauq se dast-e-sabā banāte haiñ

na.e sire se koī intihā banāne ko

na.e sire se koī ibtidā banāte haiñ

ḳhudā-shanās haiñ ham is liye ba-nām-e-sanam

haram banāte haiñ qibla-numā banāte haiñ

kabhī guzar na sakeñ apne qariya-e-jāñ se

so ham vajūd meñ apne ḳhalā banāte haiñ

kisī hasīna-e-bilqīs-adā kī ḳhātir ham

nigār-ḳhāna-e-shahr-e-sabā banāte haiñ

ham apne zehn ke qirtās par tire hote

tujhe banāte haiñ aur jā-ba-jā banāte haiñ

chalo jahān-e-ḳhayāl-o-gumān meñ 'shāriq'

phir is jahāñ sā koī sāneha banāte haiñ

shikasta-pa hain koi aasra banate hain

miTa ke KHud ko jo hum ek KHuda banate hain

hamein shuur-e-haqiqat nahin so hum aksar

fareb-e-jumbish-e-baal-e-huma banate hain

wo apne husn ka har raaz kholne ke liye

qaba banate hain band-e-qaba banate hain

abad ke dosh pe su-e-azal chale hain ki hum

naya hi naqsh koi dahr ka banate hain

KHuda-e-mausam-e-gul un ko tazgi baKHshe

jo dast-e-shauq se dast-e-saba banate hain

nae sire se koi intiha banane ko

nae sire se koi ibtida banate hain

KHuda-shanas hain hum is liye ba-nam-e-sanam

haram banate hain qibla-numa banate hain

kabhi guzar na saken apne qariya-e-jaan se

so hum wajud mein apne KHala banate hain

kisi hasina-e-bilqis-ada ki KHatir hum

nigar-KHana-e-shahr-e-saba banate hain

hum apne zehn ke qirtas par tere hote

tujhe banate hain aur ja-ba-ja banate hain

chalo jahan-e-KHayal-o-guman mein 'shaariq'

phir is jahan sa koi saneha banate hain