shikasta saz-e-mohabbat ki ek sada hun main

shikasta sāz-e-mohabbat kī ik sadā huuñ maiñ

jo rah ga.ī hai laraz kar vo iltijā huuñ maiñ

dam-e-nazāra ye dīvāngī-e-zauq-e-nigāh

vo mujh ko DhūñDte haiñ un ko DhūñDhtā huuñ maiñ

jahāñ ye kufr hai taqdīr kā gila karnā

ab is maqām pe apne ko pā rahā huuñ maiñ

salām ai nigah-e-be-niyāz-e-garmi-e-ishq

ḳhatā muaaf ki ab sard ho rahā huuñ maiñ

mirā hī zarf hai is mai-kada meñ ai saaqī

ki jām-e-talḳh bhī hañs hañs ke pī rahā huuñ maiñ

mirī talāsh meñ rahtī hai ḳhud mirī manzil

ġhalat ḳhayāl ki manzil ko DhūñDhtā huuñ maiñ

vahīñ se paa.ī hai manzil kī raah ai 'āsī'

jahāñ pe us kī mohabbat meñ kho gayā huuñ maiñ

shikasta saz-e-mohabbat ki ek sada hun main

jo rah gai hai laraz kar wo iltija hun main

dam-e-nazara ye diwangi-e-zauq-e-nigah

wo mujh ko DhunDte hain un ko DhunDhta hun main

jahan ye kufr hai taqdir ka gila karna

ab is maqam pe apne ko pa raha hun main

salam ai nigah-e-be-niyaz-e-garmi-e-ishq

KHata muaf ki ab sard ho raha hun main

mera hi zarf hai is mai-kada mein ai saqi

ki jam-e-talKH bhi hans hans ke pi raha hun main

meri talash mein rahti hai KHud meri manzil

ghalat KHayal ki manzil ko DhunDhta hun main

wahin se pai hai manzil ki rah ai 'asi'

jahan pe us ki mohabbat mein kho gaya hun main