shikwa apne taleon ki na-rasai ka karun

shikva apne tāle.oñ kī nā-rasā.ī kā karūñ

yā gila ai shoḳh terī bevafā.ī kā karūñ

vo ki ik muddat talak jis ko bhalā kahtā rahā

aah ab kis muñh se zikr us kī burā.ī kā karūñ

āb-e-zamzam se maiñ dho luuñ apnī peshānī ke ta.iiñ

dar pe tab us ke irāda jab.ha-sā.ī kā karūñ

ḳhuub sī tambīh karnā ai judā.ī tū mujhe

gar kisī se phir kabhī qasd āshnā.ī kā karūñ

gar musaḳhḳhar hove vo ḳhurshīd-rū merā 'bayāñ'

bādshāhī kyā ki maiñ daavā ḳhudā.ī kā karūñ

shikwa apne taleon ki na-rasai ka karun

ya gila ai shoKH teri bewafai ka karun

wo ki ek muddat talak jis ko bhala kahta raha

aah ab kis munh se zikr us ki burai ka karun

aab-e-zamzam se main dho lun apni peshani ke tain

dar pe tab us ke irada jabha-sai ka karun

KHub si tambih karna ai judai tu mujhe

gar kisi se phir kabhi qasd aashnai ka karun

gar musaKHKHar howe wo KHurshid-ru mera 'bayan'

baadshahi kya ki main dawa KHudai ka karun