shikwa gar kije to hota hai guman taqsir ka

shikva gar kiije to hotā hai gumāñ taqsīr kā

har jafā se baab khultā hai nayā ta.azīr kā

us se paiham guftugū kiije kabhī barham na ho

asl par bhārī hai pahlū aap kī tasvīr kā

dil ke dar pe haiñ ye donoñ rishta-e-ham-sā.egī

gesū-e-shab-gīr se hai fikr dāman-gīr kā

jaur se ghabrāne vaale ham nahīñ haiñ dekhiye

hausla kab tak javāñ rahtā hai charḳh-e-pīr kā

kis liye ḳhvāb-e-zuleḳhā tishna-e-ta.abīr hai

misr meñ shohra bahut yuuñ to huā ta.abīr kā

gholte haiñ kis liye vo chashma-e-haivāñ meñ zahr

kaam lete haiñ tabassum se vo kyuuñ tahqīr kā

kaash merī kah rahe haiñ sabza-o-dasht-o-daman

lāla-o-barg-o-saman aalam hai ye kashmīr kā

naaz se dekhā hai ḳhāliq ne miTāte bārhā

nāḳhun-e-tadbīr ko likkhā huā taqdīr kā

ḳhaak se kar ḳhāksārī se riyāzat se araq

aarzū kī aañch de nusḳha hai ye iksīr kā

hasratoñ se is tarah rah rah ke hotī hai ḳhalish

TuuT jaa.e lag ke dil meñ jaise paikāñ tiir kā

sher meñ 'iqbāl' kā shaidā hai 'ġhālib' kā asiir

'hāmid'-e-be-bahra-go munkir nahīñ hai miir kā

shikwa gar kije to hota hai guman taqsir ka

har jafa se bab khulta hai naya tazir ka

us se paiham guftugu kije kabhi barham na ho

asl par bhaari hai pahlu aap ki taswir ka

dil ke dar pe hain ye donon rishta-e-ham-saegi

gesu-e-shab-gir se hai fikr daman-gir ka

jaur se ghabrane wale hum nahin hain dekhiye

hausla kab tak jawan rahta hai charKH-e-pir ka

kis liye KHwab-e-zuleKHa tishna-e-tabir hai

misr mein shohra bahut yun to hua tabir ka

gholte hain kis liye wo chashma-e-haiwan mein zahr

kaam lete hain tabassum se wo kyun tahqir ka

kash meri kah rahe hain sabza-o-dasht-o-daman

lala-o-barg-o-saman aalam hai ye kashmir ka

naz se dekha hai KHaliq ne miTate barha

naKHun-e-tadbir ko likkha hua taqdir ka

KHak se kar KHaksari se riyazat se araq

aarzu ki aanch de nusKHa hai ye iksir ka

hasraton se is tarah rah rah ke hoti hai KHalish

TuT jae lag ke dil mein jaise paikan tir ka

sher mein 'iqbaal' ka shaida hai 'ghaalib' ka asir

'hamid'-e-be-bahra-go munkir nahin hai mir ka