shikwa karun main kab tak us apne mehrban ka

shikva karūñ maiñ kab tak us apne mehrbāñ kā

al-qissa rafta rafta dushman huā hai jaañ kā

girye pe rañg aayā qaid-e-qafas se shāyad

ḳhuuñ ho gayā jigar meñ ab daaġh gulsitāñ kā

le jhāḌū Tokrā hī aatā hai subah hote

jārūb-kash magar hai ḳhurshīd us ke haañ kā

dī aag rañg-e-gul ne vaañ ai sabā chaman ko

yaañ ham jale qafas meñ sun haal āshiyāñ kā

har sub.h mere sar par ik hādisa nayā hai

paivand ho zamīñ kā sheva is āsmāñ kā

in said-afganoñ kā kyā ho shikār koī

hotā nahīñ hai āḳhir kaam un ke imtihāñ kā

tab to mujhe kiyā thā tīroñ se said apnā

ab karte haiñ nishāna har mere ustuḳhvāñ kā

fitrāk jis kā aksar lohū meñ tar rahe hai

vo qasd kab kare hai is said-e-nā-tavāñ kā

kam-fursatī jahāñ ke majme.a kī kuchh na pūchho

ahvāl kyā kahūñ maiñ is majlis-e-ravāñ kā

sajda kareñ haiñ sun kar aubāsh saare us ko

sayyad pisar vo pyārā haigā imaam bāñkā

nā-haq shanāsī hai ye zāhid na kar barābar

taa.at se sau baras kī sajda us āstāñ kā

haiñ dasht ab ye jiite baste the shahr saare

vīrāna-e-kohan hai māmūra is jahāñ kā

jis din ki us ke muñh se burqā uThegā suniyo

us roz se jahāñ meñ ḳhurshīd phir na jhāñkā

nā-haq ye zulm karnā insāf kah piyāre

hai kaun sī jagah kā kis shahr kā kahāñ kā

saudā.ī ho to rakkhe bāzār-e-ishq meñ pā

sar muft bechte haiñ ye kuchh chalan hai vaañ kā

sau gaalī ek chashmak itnā sulūk to hai

aubāsh ḳhāna jañg us ḳhush-chashm bad-zabāñ kā

yā ro.e yā rulāyā apnī to yuuñ hī guzrī

kyā zikr ham-safīrāñ yārān-e-shādmāñ kā

qaid-e-qafas meñ haiñ to ḳhidmat hai nālagī kī

gulshan meñ the to ham ko mansab thā rauza-ḳhvāñ kā

pūchho to 'mīr' se kyā koī nazar paḌā hai

chehra utar rahā hai kuchh aaj us javāñ kā

shikwa karun main kab tak us apne mehrban ka

al-qissa rafta rafta dushman hua hai jaan ka

girye pe rang aaya qaid-e-qafas se shayad

KHun ho gaya jigar mein ab dagh gulsitan ka

le jhaDu Tokra hi aata hai subah hote

jarub-kash magar hai KHurshid us ke han ka

di aag rang-e-gul ne wan ai saba chaman ko

yan hum jale qafas mein sun haal aashiyan ka

har subh mere sar par ek hadisa naya hai

paiwand ho zamin ka shewa is aasman ka

in said-afganon ka kya ho shikar koi

hota nahin hai aaKHir kaam un ke imtihan ka

tab to mujhe kiya tha tiron se said apna

ab karte hain nishana har mere ustuKHwan ka

fitrak jis ka aksar lohu mein tar rahe hai

wo qasd kab kare hai is said-e-na-tawan ka

kam-fursati jahan ke majmea ki kuchh na puchho

ahwal kya kahun main is majlis-e-rawan ka

sajda karen hain sun kar aubash sare us ko

sayyad pisar wo pyara haiga imam banka

na-haq shanasi hai ye zahid na kar barabar

taat se sau baras ki sajda us aastan ka

hain dasht ab ye jite baste the shahr sare

virana-e-kohan hai mamura is jahan ka

jis din ki us ke munh se burqa uThega suniyo

us roz se jahan mein KHurshid phir na jhanka

na-haq ye zulm karna insaf kah piyare

hai kaun si jagah ka kis shahr ka kahan ka

saudai ho to rakkhe bazar-e-ishq mein pa

sar muft bechte hain ye kuchh chalan hai wan ka

sau gali ek chashmak itna suluk to hai

aubash KHana jang us KHush-chashm bad-zaban ka

ya roe ya rulaya apni to yun hi guzri

kya zikr ham-safiran yaran-e-shadman ka

qaid-e-qafas mein hain to KHidmat hai nalagi ki

gulshan mein the to hum ko mansab tha rauza-KHwan ka

puchho to 'mir' se kya koi nazar paDa hai

chehra utar raha hai kuchh aaj us jawan ka