shola hai phul-phul chaman tak na aaiyo

sho'la hai phūl-phūl chaman tak na aa.iyo

shādābī-e-bahār se dhokā na khā.iyo

muddat huī vo kū-e-malāmat ujaḌ gayā

ab ke baras charāġh-e-vafā mat jalā.iyo

dāman se ham ne gard-e-ta'alluq bhī jhaaḌ dī

āsūdgān-e-hijr ke ab muñh na aa.iyo

in muskurāhaToñ meñ dabī hai ġhamoñ kī aañch

chehre ke ruup rang se dhokā na khā.iyo

itne bure to jī ke nahīñ zūd-ranj log

āshuftagān-e-shauq pe tohmat na lā.iyo

patthar na Daal de koī jholī meñ din Dhale

'māhir' faqīr ban ke sadā mat lagā.iyo

sho'la hai phul-phul chaman tak na aaiyo

shadabi-e-bahaar se dhoka na khaiyo

muddat hui wo ku-e-malamat ujaD gaya

ab ke baras charagh-e-wafa mat jalaiyo

daman se hum ne gard-e-ta'alluq bhi jhaD di

aasudgan-e-hijr ke ab munh na aaiyo

in muskurahaTon mein dabi hai ghamon ki aanch

chehre ke rup rang se dhoka na khaiyo

itne bure to ji ke nahin zud-ranj log

aashuftagan-e-shauq pe tohmat na laiyo

patthar na Dal de koi jholi mein din Dhale

'mahir' faqir ban ke sada mat lagaiyo