shoala-e-gham ke siwa daKHil nahin

sho.ala-e-ġham ke sivā dāḳhil nahīñ

pyaar ke qābil hamārā dil nahīñ

terī sūrat ko bhulā.eñ kis tarah

tū nahīñ to raunaq-e-mahfil nahīñ

masnad-a-ta.amīr phir un ko na do

ḳhāk-e-gulshan ke bhī jo qābil nahīñ

aag paanī phuul patthar rang-o-nūr

husn kī fitrat meñ kyā shāmil nahīñ

ḳhatm hotā hai jahāñ ye rāsta

vo bhī hai ik rāsta manzil nahīñ

dil hai vo sah le hazāroñ kulfateñ

jo kare shikva vo samjho dil nahīñ

nāḳhudā le chal mujhe mañjdhār meñ

mujh ko tūfāñ chāhiye sāhil nahīñ

azm puḳhta ho agar ai 'sarfarāz'

koh-e-ġham ko kāTnā mushkil nahīñ

shoala-e-gham ke siwa daKHil nahin

pyar ke qabil hamara dil nahin

teri surat ko bhulaen kis tarah

tu nahin to raunaq-e-mahfil nahin

masnad-a-tamir phir un ko na do

KHak-e-gulshan ke bhi jo qabil nahin

aag pani phul patthar rang-o-nur

husn ki fitrat mein kya shamil nahin

KHatm hota hai jahan ye rasta

wo bhi hai ek rasta manzil nahin

dil hai wo sah le hazaron kulfaten

jo kare shikwa wo samjho dil nahin

naKHuda le chal mujhe manjdhaar mein

mujh ko tufan chahiye sahil nahin

azm puKHta ho agar ai 'sarfaraaz'

koh-e-gham ko kaTna mushkil nahin