shoalagi ho dekhna ya ho sharara dekhna

sho.alagī ho dekhnā yā ho sharāra dekhnā

dushmanī apnoñ se ho to kyā ḳhasāra dekhnā

hosh baaqī haiñ abhī kuchh jaañ badan meñ hai abhī

ai nigāh-e-sehr-zā mujh ko dobāra dekhnā

mere bachpan lauT aa tū ek lamhe ke liye

chāhtī hai zindagī tujh ko dobāra dekhnā

jab qadam rakh hī diye haiñ rahguzār-e-shauq meñ

aate jaate mausamoñ kā kyā ishāra dekhnā

sar-nigūñ tūfāñ ko karne kā nasha kuchh aur hai

chāhtā hai kaun dariyā kā kinārā dekhnā

kaun sī saa.at hai behtar kaun sā pal Thiik hai

us se milnā hai zarā tum istiḳhāra dekhnā

dil ko bhātā hai bahut bārish ke tham jaane ke baa'd

dhuup khilnā bādaloñ ko pāra-pāra dekhnā

maiñ to jab bhī dekhtā huuñ us kā chehra hī lage

sub.h kī dahlīz par raushan sitāra dekhnā

itnī āsāñ bhī nahīñ 'yāvar' hamārī shā.erī

gar samajhnā ho hameñ to isti.āra dekhnā

shoalagi ho dekhna ya ho sharara dekhna

dushmani apnon se ho to kya KHasara dekhna

hosh baqi hain abhi kuchh jaan badan mein hai abhi

ai nigah-e-sehr-za mujh ko dobara dekhna

mere bachpan lauT aa tu ek lamhe ke liye

chahti hai zindagi tujh ko dobara dekhna

jab qadam rakh hi diye hain rahguzar-e-shauq mein

aate jate mausamon ka kya ishaara dekhna

sar-nigun tufan ko karne ka nasha kuchh aur hai

chahta hai kaun dariya ka kinara dekhna

kaun si saat hai behtar kaun sa pal Thik hai

us se milna hai zara tum istiKHara dekhna

dil ko bhata hai bahut barish ke tham jaane ke ba'd

dhup khilna baadalon ko para-para dekhna

main to jab bhi dekhta hun us ka chehra hi lage

subh ki dahliz par raushan sitara dekhna

itni aasan bhi nahin 'yawar' hamari shaeri

gar samajhna ho hamein to istiara dekhna