shoalon se lala-zar hai aatish-kada hai dil

sho.aloñ se lāla-zār hai ātish-kada hai dil

zaḳhmoñ ke shab-charāġh kā ik silsila hai dil

ashkoñ ke rañg-o-nūr se āñkheñ dhulī dhulī

soz-o-faroġh-e-karb se sad-soḳhta hai dil

naama mire vajūd kā do lafz meñ asiir

pahchān merī ishq hai merā pata hai dil

sahnā tamām vaar muqaddar usī kā hai

āmājgāh-e-ishq meñ goyā zarā hai dil

anjān hādsoñ se munavvar hai kā.enāt

lekin sabhoñ meñ sab se ajab hādisa hai dil

aadam kī fard-e-jurm virāsat banī 'shahāb'

jannat ke mai-kade se uḌāyā nasha hai dil

shoalon se lala-zar hai aatish-kada hai dil

zaKHmon ke shab-charagh ka ek silsila hai dil

ashkon ke rang-o-nur se aankhen dhuli dhuli

soz-o-farogh-e-karb se sad-soKHta hai dil

nama mere wajud ka do lafz mein asir

pahchan meri ishq hai mera pata hai dil

sahna tamam war muqaddar usi ka hai

aamajgah-e-ishq mein goya zara hai dil

anjaan hadson se munawwar hai kaenat

lekin sabhon mein sab se ajab hadisa hai dil

aadam ki fard-e-jurm wirasat bani 'shahab'

jannat ke mai-kade se uDaya nasha hai dil